Serok Nêçîrvan Barzanî di gel Seroka Macaristanê civiya

PDK-S: Birêz Nêçîrvan Barzanî Serokê Herêma Kurdistanê, êvariya roja Înê 09.12.2022ê li bajarê Hewlêrê, pêşwaziya xatûn Katalin Novak Seroka Macaristanê kir û civiyan.

Di civînê da têkiliyên Macaristanê digel Iraq û Herêma Kurdistanê, proseya siyasî û rewşa Iraqê bi giştî, pirsgirêkên Hewlêr-Bexdayê û diyaloga ji bona çareserkirina wan pirsgirêkan, şerê li dijî terorê û metirsiyên Daîşê, rewşa koçber û penaberan û pêkhateyan li Herêma Kurdistanê hatin gotûbêj kirin.

Her du aliyan tekez li ser xwesteka du alî ya ji bo pêşxistina têkiliyan û hevkariyên hevbeş di hemû waran da kirin, û herwesa berdewamiya hevkarî û piştevaniya hevpeymaniya navdewletî ji bo Iraq û Herêma Kurdistanê ji bo rûbirûbûna terorîstan û jinavbirina Daîşê bi pêwîst zanîn.

Serok Nêçîrvan Barzanî kêfxweşiya xwe ji bo serdana Seroka Macaristanê nîşana da û ew serdan wek piştevanîkirina Herêma Kurdistanê bi nav kir û ji bo piştgiriya serbazî di dema şerê li dijî Daîşê da bo Iraq û Herêma Kurdistanê û alîkariyên mirovî bi taybetî bo Mesîhî û Êzdiyan, li ser navê Herêma Kurdistanê, spasiya Macaristanê kir.

Birêz Katalin Novak Seroka Macaristanê, ji aliyê xwe ve, bi navê welatê xwe spasiya qurbanî û rola Pêşmerge di têkşikandina Daîşê da kir û tekez li ser berdewamiya piştevanî û hevkarîkirina Iraq û Herêma Kurdistanê ji bo jinavbirina terorê kir. Herwesa teror û Daîş bo ser azadî û demokrasiyê bi metirsî zanî û spasiya
Herêma Kurdistanê kir ji bo pêkvejiyan, tolerans û parastina koçber, penaber û pêkhateyan, bi taybetî pêkhateyên Mesîhî û Êzdî.

Her di vê hevdîtinê de behsa peywendiyên Iraq û Herêma Kurdistanê digel welatên cîran û navçeyê, giringiya parastina aramî û serweriya Iraqê, şerê Ukraynayê û encamên wê û çend mijarên din hatin nirxandin.

Malpera fermî